Баянзүрх дүүргийн засаг дарга Н.Баярмөнх тус дүүргийн 26-р хороонд тав хоногийн хатуу хөл хорио тогтоон бантагнуулж УИХ-ын гишүүд, Улсын онцгой комиссын даргаас ойлгомжгүй байдал үүсгэсэн гэдэг “жавтий” хүртсэний эцэст гаргасан шийдвэрээ цуцлав.

Тэрээр хөл хорио тогтоох болсон үндэслэлээ “Мэргэжлийн байгууллагуудын өгсөн зөвлөмжийг үндэслэж Засаг дарга шийдвэр гаргасан. Түүнээс биш дүүргийн засаг дарга ганцаараа дур мэдээд хороо, байраар нь хаах ямар ч эрх мэдэл байхгүй. Эрүүл мэндийн яам, дүүргийн эрүүл мэндийн төв гэх мэт мэргэжлийн байгууллагуудаас ирүүлсэн “энэ хороог хааж өгнө үү, бид энд тандалт судалгааны ажил хиймээр байна” гэсэн бичиг цаасыг үндэслэж дүүргийн онцгой комисс хуралдан шийдвэрээ гаргаад энэ ажиллагаа явагдаж байгаа” хэмээн тайлбарлажээ.

Хачирхалтай нь УОК, НОК, ЭМЯ-наас 26-р хороонд хатуу хөл хорио тогтоо гэдэг ямар ч чиглэл өгөөгүй байхад Баянзүрхийн дүүргийн засаг дарга Н.Баярмөнх тус хороонд дур мэдэн хөл хорио тогтоож том толгойлсон болох нь тодорхой болов.

Үүнийг Эрүүл мэндийн сайд С.Энхболдын тайлбар батлаж байгаа юм. Тэрээр энэ талаар “Баянзүрх дүүрэгт цар тахлын тархалт өндөр идэвхтэй, голомттой байгаа учраас дараагийн шатны арга хэмжээг авч ажиллана уу гэдэг албан бичгийг явуулсан нь үнэн. Ингэхдээ хатуу хөл хорио тогтоо гэсэн тодорхой заалтуудыг дурдаагүй. Нийслэлийн онцгой комисстой ярилцсаны дагуу ийм албан бичиг, саналыг явуулсан. Хатуу хөл хорио тогтоо гэдэг чиглэл өгөөгүй” хэмээн чуулганы хуралдаанд мэдэгджээ.

Нөгөөтээгүүр Н.Баярмөнх Баянзүрх дүүргийн 26-р хороонд тав хоногийн хатуу хөл хорио тогтоох тухай шийдвэрээ тус хорооны иргэдэд урьдчилж мэдэгдээгүйгээс болж эрдэнэт хүний амь нас зүй бусаар эрсдэх, цаашлаад энэ мэт гэнэтийн шийдвэрээс болж ахуй нэгжүүд эдийн засгийн хохиролд унаж, олон мянган хүний ажил амьдралын хэмнэл алдагдсан болох нь тодорхой болж байна.

Хамгийн сонирхолтой нь хөл хориог урьдчилж мэдэгдээгүй шалтгаанаа тэрээр “Өнгөрсөн хугацаанд иргэдээс хэд хэдэн удаа шинжилгээ авч байсан. Иргэдэд эрт зарлахад зуслан руугаа эсвэл хорооноосоо гараад өөр тийшээ явах тохиолдол гарсан. Ингэснээр шинжилгээг үр дүнгүй болгодог тул энэ удаад иргэдэд орой мэдээлсэн” хэмээн хэвлэлд өгсөн ярилцлагадаа онцолжээ.

Н.Баярмөнх гэгчид тэгвэл УОК, НОК, Эрүүл мэндийн яамнаас өгөөгүй чиглэлийг өгсөн болгож хөл хорио тогтоох ямар ашиг сонирхол байв гэдэг асуулт анхаарал татаж байна. Хариулт нь 26-р хорооны засаг даргын сандал суудал байсан гэдэг асуудал ч тодорхой болж эхэллээ. Учир нь тэрээр засаг даргаар томилогдсоноосоо хойш дүүргийнхээ 28 хорооны засаг даргыг Ардчилсан намын үед томилогдсон гэдэг шалтгаанаар ажлаас нь халж сольсоор эцэст нь ганцхан хороо үлдээд байсан нь 26 гэдгийг тус хорооны засаг дарга асан Г.Отгонбаатар ярьжээ. Г.Отгонбаатарын тухайд дүүргийн засаг дарга Н.Баярмөнх “ажлаа өг” гэдэг шахалтыг өдөр бүр үзүүлж байсан учир аргагүйн эрхэнд өргөдлөө өгсөн гэжээ.

Энэ бүхнээс товчхон дүгнэхэд, Н.Баярмөнх гэгч хороон засаг даргын албан тушаалыг булааж авахын тулд УОК, НОК, Эрүүл мэндийн яамнаас давсан шийдвэр гаргаж бүхэл бүтэн хороогоор нь хөл хорьсон юм биш байгаа гэдэг хардлага төрж байгааг нуух юун. Тиймээс иргэдийнхээ төлөө биш эсрэг ажиллаж амиа хорлохоос өөр аргагүй байдалд оруулсан түүнд хариуцлага тооцож албан тушаалаас нь огцруулахыг цаашид шаардацгаая!