Өнгөрөгч орон нутгийн сонгуульд Баянгол дүүрэгт МАН 20, АН 19, ХҮН хоёр, МАХН нэг суудал авсан. Улмаар МАХН-аас сонгогдсон төлөөлөгч Э.Магнайбаяр МАН-д элссэнээр Баянгол дүүрэгт МАН олонх болж дүүргийн засаг даргаар Ө.Сумьяабаатар, дүүргийн иргэдийн төлөөлөгчдийн хурлын даргаар Б.Сэмжидмаа нар сонгогдон бүрэн эрхээ хэрэгжүүлэх боломж бүрдсэн юм.

Гэтэл Баянгол дүүргийн Иргэдийн төлөөлөгчдийн хурал ийнхүү бүрэн эрхээ хэрэгжүүлж эхэлснээс хойш хоёр сарын дараа тус дүүргийн ИТХ-ын данснаас 34.5 сая төгрөг Ж.Ганбаатар даргатай Баянгол дүүргийн МАН-ын Хорооны данс руу шилжиж оржээ.

Тодруулбал, 2020 оны 12 дугаар сарын 24-ний өдөр “төлөөлөгчдийн урамшуулал”  нэртэй 34.500.000 төгрөгийн гүйлгээ БГД-ийн ИТХ-ын данснаас  гарч БГД-ийн МАН-ын Хорооны дансанд шилжиж орсон баримт шилэн дансны сайтад бичигджээ.

Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд төлөөлөгчдийн хурлын ажилд оролцсон байдлыг харгалзан урамшуулал олгож болно гэж заасан байдаг ч төлөөлөгчдийн урамшууллын мөнгийг аль нэг улс төрийн намын дансанд шилжүүлнэ гэсэн заалт алга байна.

Эндээс харвал БГД-ийн ИТХ-ын дарга Б.Сэмжидмаа цагаан дээр хараар бичсэн хуулийг зөрчиж эрх хэмжээгээ хэтрүүлэн ашигласан байх магадлалтай байна.

ЭХ СУРВАЛЖ: NEWSTV.MN