Энэ эмэгтэйг ингэж нэг дуугараасай гэж бодож явсан юм. Зөвхөн ганц сайт сүүлийн нэг жилд Ц.Гарамжав гэдэг хүн рүү 400 орчим удаа дайрчээ. Энэ тухайгаа өөрөө дурдсан байна билээ. Үндэсний хөрөнгө оруулагчид, бизнес эрхлэгчид, үйлдвэрлэгчдээ босч ирэхгүй болтол нь татвар татаасаар дарамтлах нь багадаад мэдээллийн хүчирхийллээр доромжилдог болсоор удсан.

Монголд байтугай Азид үйлдвэр босгосон эмэгтэй удирдагч цөөн. Харин Ц.Гарамжав эрсдэлээс айлгүй Европийн хөрөнгө оруулалтын банкнаас зээл авч, Монголд тэргүүлэх цементийн үйлдвэр барьсан нэгэн.

Түүнийг Монголбанкны 10 тэрбум, гаалийн татварын гэх 33 тэрбум гэхчлэн асар их мөнгөтэй хутгасан мэдээллүүд цацагдаад удаж байгаа. Харин удаан тэссэний эцэст Ц.Гарамжав мэдээллийн хүчирхийлэлд мэндийн хариу өгсөн байна.

Монголбанк бол зээл өгдөг субъект биш, анхнаасаа байгаагүй зээлийг төлүүлээгүй болохыг АТГ жил гаруй хугацаанд шалгаад тогтоосон хэмээн уг мэдэгдэлдээ дурдаад, мэдэхгүй чадахгүй салбар руугаа орж хүн гүтгэх нь мэдээллийн хүчирхийлэл гэдгийг онцолсон байна.

Сүүлийн үед сүр зарлаад байгаа 33 тэрбумын өр гэдэгт ч мөн тайлбар хийжээ. Үндэсний хөрөнгө оруулагчид Монголдоо үйлдвэр барихаар тоног төхөөрөмж хилээр оруулж ирсэн бол үүнийг Хөрөнгө оруулалтын хуулиар татвараас чөлөөлөх ёстой. Гэтэл энэ зүйл заалтаа Гаалийн татварын тухай хуульдаа тусгаагүйгээс ийнхүү Ц.Гарамжавыг барьж авч, балбах бас нэг шалтгаан үүсчээ. Энэ мэтийн хоорондоо зөрчилтэй хуулиудыг УИХ-ын дарга, Сангийн сайд нар өөрсдөө хулхины хуулиуд гэж онцолж хэлсэн санагдаж байна.

За энэ яахав, миний хамгийн их сонирхоод байгаа нэг зүйл бол Монголын эх орончдыг монголоор нь бариулдаг болоо юу даа гэсэн хардлагыг Ц.Гарамжав нотолсон байх юм. Ж.Эрдэнэбатын Засгийн газар 2016 оны 12 дугаар сард, бүх хүн шинэ жилдэж явах сиймхийгээр Тавантолгойн ордыг эдийн засгийн эргэлтэнд оруулах, Хятадын "Шинхуа" компанитай хамтран ашиглах асуудлыг УИХ-аар хэлэлцүүлсэн. Уул уурхайн инженер, үйлдвэр босгосон хүний хувьд Ц.Гарамжав уг төслийн том сул талыг олж харж, эрс эсэргүүцсэн байдаг.

Өнгөн талдаа Монголын тал 51 хувь, Хятадын тал 49 хувьтай байхаар схемчлэгдсэн боловч мэргэжлийн задаргаа хийгээд үзэхээр "Шинхуа" 90 хувийг нь эзэмшихээр зохицуулсан уг тогтоолыг эсэргүүцэж, уул уурхайн инженерүүдтэй хамтран тооцоо судалгаа гаргаж, үүнийгээ ил тод зарлан Тавантолгойг Хятадын талтай хамтран олборлох Ж.Эрдэнэбатын тогтоолын төслийг буцаалгасан байдаг. 

Чингэхдээ Ц.Гарамжав 30 гаруй эрдэмтэн, эдийн засагчидтай хамтран Тавантолгой нь Жорк стандартын ангиллаар нэг тунамал, 715 их наяд, 700 тэрбум төгрөгийн үнэ бүхий баялагтай орд газар гэдгийг гаргаж тавьжээ. Тэр үед "Шинхуа"-д тавиад туучихсан бол юун иргэн бүр ногдол ашиг аваад сууж байх юм болох байжээ. Ингээд харахаар хийсэн бүтээсэн юмтай, хэлэх үгтэй эх орончдыг маань ганц нэгээр нь намнаад, балбаад, хэлмэгдүүлээд, гаднын явуулгаар мэдээллийн хүчирхийлэл үйлдээд, монголчуудыг үүгээрээ талцуулан хуваагаад байдаг манж маягийн технологи манайд үйлчлээд удаж дээ.

Миний мэдэхийн "Петровис"-ийн Ж.Оюунгэрэл гэж мундаг эмэгтэйг Багануурын хүрэн нүүрснээс шингэн түлш гаргаж авахаар Германы технологи оруулж ирэх гэснийх нь төлөө арав гаруй жил балбасан, барьж идсэн. Аль эрт монголчууд шингэн түлштэй болох боломжийг л тэр хүн олж харсан шүү дээ. Гүтгүүлсэн болгон нь гүрийгээд дуугүй явдаг. Харин энэ удаа Ц.Гарамжав мэдээллийн хүчирхийлэлд мэндийн төдий хариу өгсөн байна. Хийсэн бүтээсэн, хэлсэн өмгөөлснийхөө төлөө хэлмэгдээд яваа хүмүүс соёлт зангаа түр ч гэсэн орхиод, үнэнийг ингээд шууд хэлчихдэг байгаасай даа. 

ЭХ СУРВАЛЖ: НИЙТЛЭЛЧ Р.ЭМҮЖИН