“Эрдэнэт үйлдвэр” ТӨҮГ-ын удирдлагууд Зайсанд байрлах “Жарден” хотхоны 202, 302  тоот тансаг зэрэглэлийн пентхаусуудыг төрийн өмчийн 4.7 тэрбум төгрөгөөр худалдан авч, ашиглахгүйгээр нуусан асуудал хэдэн жилийн өмнө ил болж байв.  

Уг байруудыг 2017 оны наймдугаар сард худалдан авсан байдаг бөгөөд тухайн үед “Эрдэнэт” үйлдвэрийн гүйцэтгэх захирлаар өнөөгийн ерөнхий захирал Х.Бадамсүрэн, тэргүүн дэд захирлаар Б.Шинэбаатар, эдийн засаг эрхэлсэн орлогчоор  Д.Дэлгэрбаяр  нар ажиллаж байжээ.

Гэтэл Х.Бадамсүрэн тэргүүтэй Эрдэнэтийн удирдлагууд өөрсөддөө энэ мэтээр тансаг байр худалдаж аваад зогсохгүй сүлд модны наадам зохион байгуулан, “Алтан азтан” шалгаруулж ажилтнуудаа орон сууцаар шагнаж байжээ.

Тодруулбал, “Эрдэнэт үйлдвэр” ТӨҮГ 2019 оныг угтаж тэргүүний ажилтнуудын шинэ жилийн сүлд модны наадам зохион байгуулсан байна. 

Энэ үеэр “Алтан азтан”-аар шалгарсан Б.Х, Ж.У нарт Ерөнхий захирал Х.Бадамсүрэнгийн 2019 оны 01 дүгээр сарын 16-ны өдрийн А/20 дугаар тушаал болон  2018 оны 12 сарын 18-ны өдрийн А/1093 дугаар тушаалуудаар  139.24 сая төгрөгөөр үнэлэгдэх 53.6 м2 орон сууц, 121.58 сая төгрөгөөр үнэлэгдэх 46.8 м2 хоёр орон сууцыг бэлэг болгон шилжүүлсэн байна.

Эдгээр байрууд нь нийтдээ 260 сая төгрөг болж байгаа бөгөөд байр шилжүүлсэн асуудлыг 2020 онд Аудитын Ерөнхий газраас шалгаж үзээд эрх бүхий байгууллагын шийдвэргүйгээр шилжүүлсэн зөрчлийн шинж чанартай, дүрэм журам зөрчсөн үйлдэл болсон байна хэмээн дүгнэжээ.

ЭХ СУРВАЛЖ: NEWSTV.MN