УИХ-ын гишүүн Б.Жавхлан өчигдөр /2020.12.05/ тойргийнхоо иргэдэд хүнсний тусламжийн багц гардуулах нэрийдлээр халдварын голомтоор зарлагдаад буй нийслэл Улаанбаатар хотоос гарч Дарханд очсон нь УОК-ын шийдвэрийг зөрчсөн алхам боллоо гэх шүүмжлэлд өртөөд байна.

Б.Жавхлангийн тухайд  очсон даруйдаа хуурай сүү, элсэн чихэр, 2 кг гурил, 3.5 кг цагаан будаа, ургамлын тос, консерв гэх мэтээс бүрдсэн хүнсний тусламжийн багцыг тойргийнхоо 200 өрхөд гардуулжээ.

Түүний айл өрхүүдэд гардуулсан 3 воган нүүрс, маск, гурил будаанаас бүрдсэн хүнсний тусламжийн багц нийлээд 128 сая орчим төгрөг болж байгаа аж. Гэтэл энэ бүх мөнгийг жилийн /2019 он/ 26 сая төгрөгийн орлоготой хэмээн АТГ-т мэдүүлсэн түүнийг хувиасаа гаргасанд гайхах хүмүүс олон байна.

Мөн тэрээр Дархан Уул аймгийн нэгдсэн эмнэлгийн үйл ажиллагаатай танилцах үеэрээ Нэгдсэн эмнэлгийн Халдвартын тасагт коронавирусийн эмчилгээ хийхэд шаардлагатай тоног төхөөрөмжүүдийн санхүүжилтэд Засгийн газраас шийдэж өгсөн 400 сая төгрөгийг мөн л хувиасаа шийдсэн мэтээр шоудаад авсан бололтой.