УИХ-ын гишүүн Б.Энхбаяр өөрийн цахим хуудастаа “УБТЗ гэмт хэрэгтнүүдийн үүр боллоо” гэх гарчигтай нэгэн бичлэг эвлүүлснээ нийтэлжээ. Тэрээр тухайн бичлэгийнхээ тайлбарт, “Төмөр зам тойрсон мафид хариуцлага, сахилга бат ярихаар Пунцаг мэтийн хууль сахиулагч байхдаа хятадуудаас хахууль авч баригдсан, ялтай байх хугацаа нь дуусаагүй байхдаа Цогоо мэтийн найзынхаа түлхээсээр төмөр замд дарга болсон авилгачид төмөр замчдын нэр барьж дайрахгүй ээ. Одоо болно” хэмээн бичсэн байна.

Б.Энхбаяр үүнээс өмнө “Төмөр замд сахилга хариуцлага, хорио цээрийн дэглэм алдаж найр наадам, тэмцээн болсоор корона алдсан нөхдөд хариуцлага тооцох хэрэгтэй. Хоёр улсын хамтарсан компани гэдгээр дандаа хууль, хариуцлагаас бултана. Тэгж яривал гэрээ нь Монгол Улсын Үндсэн хуулийг зөрчсөөр удаж байна” хэмээн төмөр замчдыг буруутгасан жиргээ бичин нийтэлсэн байжээ.

Үүн дээр УИХ-ын гишүүн Ж.Сүхбаатар нэмэгдэж “Төмөр замын салбарын сахилга хариуцлага муугаас голомтолсон короновирусийн халдвар өргөн тархсан нь бодит байдал. Короновирусийг тархаах нөхцөл бүрдүүлсэн албан тушаалтнуудад хариуцлага ярих ёстойгоос биш тэмцэж байгааг нь баалж өөлж гутааж суух цаг биш...” хэмээн жиргэн даарин дээр давс нэмж, асуудлыг дэвэргэжээ.

Харин УИХ-ын гишүүн Ж.Сүхбаатар, Б.Энхбаяр нарын “короновирус төмөр замаас голомтолсон” гэх дээрх байр суурийг ор үндэслэлгүйгээс гадна, Монгол Улсын Үндсэн хуулийн Хоёрдугаар бүлгийн 14-2-т заасан "Хүнийг үндэс угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно. Хүн бүр эрх зүйн этгээд байна” гэсэн хуулийн заалтыг зөрчиж олон мянган төмөр замчдыг ялгаварлан гадуурхлаа хэмээн төмөр замчид дээрх гишүүдийг буруутгаж байгаа аж.

Тиймээс Б.Энхбаяр гишүүний эвлүүлсэн бичлэгт нэр дурдагдсан “УБТЗ” ХНН-ийн Дотоод аудит, хяналт шалгалтын албаны орлогч дарга Ж.Пунцаг төмөр замчдаа өмөөрөн УИХ-ын гишүүдэд салаавч өгч буйгаа мэдэгджээ.

Тодруулбал тэрээр “Төмөр замчид руу дайрч давшлахыг хүлцээд тэвчиж чадахгүй. Май шүү. Бид чи биш. 16 мянган салаавч шүү чамд. Чамд төмөр зам тэр кроногоос нь илүү хүчтэй гэдгийг мэдрүүлнэ шүү” гэх үгээр УИХ-ын гишүүдэд хариу барьсан байна.

ЭХ СУРВАЛЖ: NEWSTV.MN