Өчигдөр орой гэрийнхээ ойролцоох супермаркет орж хүнс цуглуулав. Хүнс харьцангуй элбэг ч кассан дээр нэлээдгүй очертой байв. Энэ үеэр кассын дэргэд зогсож байтал худалдагч охидын яриа чих дэлсэв.

-Хүүшээ нээрээ орой яаж гэртээ харьнаа?

-Танайх хаана билээ?

-Манайх Баян хошуунд ш дээ.

-Нээрээ автобус орой 20:00 цагт зогсоно гэсэн ш дээ, яаж харина аа.

-Энэ хотын дарга гэж үнэн дүпп нөхөр юм аа, дандаа амьдралгүй шийдвэр гаргаж байх юм.

Худалдагч охидын энэ мэт яриаг сонсоод нээрээ юу билээ гэж бодогдов.

Хотын дарга захирамж гаргаж нийтийн тээврийг өглөө 07:00-10:00 цаг, орой 17:00-20:00 цагт явуулахаар болсон. Харин хүнсний дэлгүүрүүд орой 21:00-22:00 цаг хүртэл ажиллаж байгаа. Үүнтэй холбоотой үүсэж буй нэг асуудал бол томоохон супермаркет болон бусад хүнсний дэлгүүрүүдэд ажиллаж байгаа ажилтнууд ажлаа тараад хэрхэн, ямар унаагаар гэртээ харих вэ гэдэг асуудал. 

Хотын төвд ойр байдаг нь алхдаг юм байж гэж бодоход хаа хол Баян хошуу, Зүүн салаа, Орбит, Улиастайд гэр нь байдаг ажилтнууд яаж харих ёстой юм бол. Тэднийг иргэдэд үйлчилгээ үзүүлснийх нь төлөө хохь чинь гээд орхих уу. Зүй нь бол нийтийн тээврийн үйлчилгээг дэлгүүрүүд бүрэн хааснаас хойш 1 цагийн дараа зогсох байдлаар зохицуулалт хийсэн бол болох байсан мэт. Гэвч Хотын даргын маань нийслэлийн иргэдийн нэгээхэн хэсэг болсон тэднийг бодсонгүй юу. Ямартай ч түүний гаргасан захирамж хуудуутай гэдэг нь худалдагч охидын ярианаас бэлээхэн анзаарагдана.

Дараа нь Хотын дарга дахин нэг шийдвэр, захирамж гаргав. Тэрбээр энэ удаад хүнсний түгээлтийг үдшийн 22:00 цагаас өглөөний 06:00 цагт дэлгүүрүүдэд хүргэх ёстой гэв.

Хүнс түгээлт шөнийн цагаар хийгддэг болсноор энэ салбарт ямар өөрчлөлт гарч байгаа талаарх бяцхан ажиглалтаа хуваалцъя. Хотын даргын шийдвэрээс өмнө буюу хэвийн нөхцөлд хүнс тухайн өдөр, цаг минутдаа үйлдвэрлэгдээд халуунаараа шахуу хэрэглэгчдийн гарт хүрдэг байв. Гэтэл одоо үүсээд байгаа нөхцлөөр тухайн өдөртөө үйлдвэрлэгдсэн хүнсний бүтээгдэхүүнүүд оройн 10:00 цагаас хойш буюу шинэ чанараа нэгэнт алдсаныхаа дараа дэлгүүрүүд рүү ачигдаж байна. Товчхондоо шинээрээ хэрэглэгчдийн гарт хүрэх ёстой талх, өндөг өдөржин хүлээгдээд шөнө нь түгээгдэхээр ачигдан гарч байна гэсэн үг.

Нөгөө талдаа хүнсний дэлгүүр, супермаркетууд үдшийн 21:00-22:00 цагийн хооронд хаалгаа барих учиртай. Тэднийг хаахтай зэрэгцэн хүнс нь тээвэрлэгдэн хүрч ирнэ. Хүнсний дэлгүүр тооцооны нярав, ачигч буулгагч, өрөгч /лангуун дээр өрөх худалдагч/ нараа тэднийг иртэл хүлээлгэж илүү цагаар ажиллуулах шаардлага гарна. Магадгүй хүнсний үйлдвэрийн түгээлтийн машины тоо хүртээмжээс хамаараад хүнсний дэлгүүрүүд шөнөжин хүнсээ хүлээгээд суух шаардлага гарах нь.

Зүй нь бол өдрийн цагаар хүнсний түгээлтийн машиныг явуулж, иргэдэд шинэ хүнс хүргэхэд буруудах зүйл огт үгүй. Гэтэл шөнө короновирус унтдаг буюу идэвхгүй байдаг гэж Хотын удирдлагууд боддог нь ийм шийдвэр гаргахад хүрсэн байж болзошгүй байна.

Цаашлаад хотын удирдлагуудын энэ мэт харалган шийдвэрүүдээс болоод иргэдийн өдөр тутмын хэрэглээний талх, сүү, өндөг  зэрэг өргөн хэрэглээний барааны хомстол бодитоор нүүрлэж болзошгүй нь. Учир нь Нийслэлийн онцгой комиссоос гаргаж буй эргэж буцсан шийдвэрүүд хийгээд оройн 22.00 цагаас хойш түгээлт хийх тухай шийдвэр нь хүнсний салбарт дээр дурдсанчлан доголдол үүсгээд эхэлснийг иргэдээсээ эхлээд их хурлын гишүүд дуу нэгтэйгээр хэлж байна.

Ж.Ганбаатар тэргүүтэй УИХ-ын гишүүдийн  зүгээс шөнө түгээлт хийх чадавх жижиг дэлгүүр, аж ахуй нэгжид байхгүйг онцолж байгаа бол Шадар сайд Я.Содбаатар хүнсний салбарт уян хатан зохицуулалт хийе гэдгээ өнөөдөр хэллээ.

Ямартай ч зайлшгүй энэ мэт нөхцөлийн улмаас хотын дарга Та удахгүй хүнс түгээлтийг шөнийн цагаар явуулах захирамжаа дахиад л цуцлаж таарах нь дээ...

ЭХ СУРВАЛЖ: NEWSTV.MN