МАН-ын Ерөнхийн нарийн бичгийн дарга Д.Амарбаясгалан хэвлэлд өгсөн ярилцлагадаа 2021 онд МАН-аас Ерөнхийлөгчийн сонгуульд нэр дэвших боломжтой таван хүнийг нэрлэжээ. 

Тэрээр Монгол Улсын Ерөнхийлөгчийн сонгуульд өрсөлдөх боломжтой хүнээр Монгол Улсын Ерөнхий сайд У.Хүрэлсүх, УИХ-ын дарга Г.Занданшатар, УИХ-ын гишүүн С.Батболд, Ерөнхий сайдын зөвлөх Ц.Нямдорж, УИХ-ын гишүүн асан Ө.Энхтүвшин нарыг нэрлэсэн байна.

Энэ талаар Д.Амарбаясгалан, “Манай намын гишүүд, улстөрчдийн зүгээс МАН-ын дарга У.Хүрэлсүхийг нэр дэвшүүлээч гэсэн хүсэлт олноор ирж байна. УИХ-ын дарга Г.Занданшатарын нэрийг дэвшүүлэх ёстой гэсэн санал, хүсэлтүүд ирж байна. УИХ-ын даргын хувьд бүрэн боломжтой. 

Мөн намын дарга, Ерөнхий сайдаар ажиллаж байсан хүмүүсийн нэр ч энэ дунд яригдаж байна. МАН-ын дарга, Ерөнхий сайдаар ажиллаж байсан УИХ-ын гишүүн Сүхбаатарын Батболдын нэрийг дэвшүүлэх санал ирж байна. УИХ-ын дарга, ХЗДХ-ийн сайд асан Ц.Нямдорж гуайн нэр яригдаж байна. Ө.Энхтүвшин даргын нэр бас яригдаж байна” хэмээн ярьжээ.

Улстөр судлаачдын зүгээс МАН-ын Ерөнхийн нарийн бичгийн дарга Д.Амарбаясгалангийн нэрлэсэн таван хүнийг хамгийн боломжтой хувилбар гэдэгтэй санал нэгджээ. Мөн Ерөнхий сайд У.Хүрэлсүх, УИХ-ын дарга Г.Занданшатарын нар Ерөнхийлөгчийн сонгуульд нэр дэвшихээс татгалзвал Ерөнхийлөгчийн сонгуульд нэр дэвших боломж Ц.Нямдорж, Сү.Батболд нар дээр нээгднэ гэдгийг бас давхар онцолсон байна. 

ЭХ СУРВАЛЖ: NEWSTV.MN