ШӨХТГ-ын Ажлын хэсэг Эмээлтэд үйл ажиллагаа явуулдаг "Эм Ди Си Пи" гэх мах бэлтгэх үйлдвэр шалгалт хийжээ. Шалгалтын үеэр бэлтгэж буй махаа химийн бодисоор угааж үнэрийг нь дардаг байсан байж болзошгүй нөхцөл байдал тогтоогдсон бөгөөд махнаас авсан дээжид МХЕГ-ын лабораторид шинжилгээ хийж байгаа аж.

Мөн ШӨХТГ-аас хийсэн хяналт шалгалтын явцад өөр нэг ноцтой асуудал илэрсэн нь тус үйлдвэрийн бэлтгэсэн махнууд нь Монголд үйл ажиллагаа явуулдаг Хиам, консерьвийн үйлдвэрийн (ХКҮ) хаяг шошготой байсан болох нь тогтоогджээ. 

“ХКҮ” компани нь “Мах Импекс” компанийн салбар үйлдвэр бөгөөд өөрийн танилцуулгадаа "Мах импекс" ХК-ийн дотоодын зах зээл дэх стратегийн нэгж хэмээн онцлон дурджээ.

Тэгвэл энэхүү асуудлаас үүдэн "Мах Импекс" ХК-ийн салбар үйлдвэр шаардлага хангаагүй бохир орчинд махаа бэлтгүүлж, түүгээр нь "Мах Импекс" ХК хиам үйлдвэрлэдэг байсан уу гэх айдас, түгшүүр хэрэглэгчдийн дунд үүсээд эхэлжээ. 

Харин "Мах Импекс" ХК-ийн зүгээс дээрх мэдээллийг үгүйсгэж, “Химийн бодистой мах хадгалж, худалдаалсан байж болзошгүй гэх Эмээлтэд байгаа компани нь “Мах импекс” болох “ХКҮ” ХХК-тай ямарч хамааралгүй. Манай компанид мах нийлүүлэх тусгай гэрээ, эрх, зөвшөөрөл байхгүй. Тус компани нь манай компанийн хаяг, шошгийг хууль бусаар ашиглаж, бусдыг төөрөгдөлд оруулж, манай компанийн нэр хүндийг унагааж байна" гэсэн мэдэгдлийг гаргажээ.

Дашрамд сонирхуулахад, "ХКҮ" ХХК-ийг Ерөнхийлөгч асан Халтмаагийн Баттулгын төрсөн эгч Халтмаагийн Цэндбаяр эзэмшдэг бол "Мах Импекс" ХК-ийг Халтмаагийн Баттулга өөрийн төрсөн дүү Халтмаагийн Баттуулын хамтаар эзэмшдэг ажээ.