Хөгжлийн банкны чанаргүй зээлдэгч “Мондулаан трейд” ХХК 2018 оны 10 дугаар сарын 22-ний өдөр тус банкнаас 15 тэрбум төгрөгийн зээл авсан байдаг. Өдгөө “Мондулаан трейд” ХХК-ийн зүгээс Хөгжлийн банканд төлөх ёстой нийт өр төлбөр 17,8 тэрбум төгрөгт хүрээд байгаа ажээ.

“Мондулаан трейд” ХХК-ийн хувьцаа эзэмшигчээр Нүүдэлчин групп, Шийрэв овогтой Мөнхнаст,  Миеэжав овогтой Нямбаатар, Цэдэниш овогтой Баярсайхан нар бүртгэгдсэн талаар Улсын бүртгэлийн сайтад мэдээлжээ.

Тэгвэл тус компанийн хувьцаа эзэмшигч Ц.Баярсайхан нь Чингисхаан банкны ерөнхий захирал асан Будням овогтой Батхүүгийн эхнэр юм байна. Харин Б.Батхүү нь УИХ-ын гишүүн, Сангийн сайд Б.Жавхлангийн эхнэр Амийль овогтой Соёлмаатай "Ньюгоби гэйт" ХХК-ийг хамтран эзэмшдэг, бизнесийн хамтрагчид ажээ.

Энэ утгаараа Хөгжлийн банкны чанаргүй зээлдэгч "Мондулаан трейд" ХХК-ийг хувьцаа эзэмшигч, холбоо хамаарлаар нь хөөгөөд үзэхэд УИХ-ын гишүүн, Сангийн сайд Б.Жавхлантай хамаарал бүхий этгээдийн нэр ус гарч байгаа нь анхаарал татаж байгаа юм.

Мөн Б.Батхүүгийн эхнэр Ц.Баярсайхан нь Чингисхаан банкны гол хувьцаа эзэмшигчдийн нэг бөгөөд тэрээр Чингисхаан банкны 28 хувийн хувьцааг эзэмшдэг байна. Түүнчлэн Ц.Баярсайхан нь  А.Соёлмаатай үй зайгүй найз нөхдийн харилцаатай гэдэг мэдээллийг  ч зарим хэвлэлд бичжээ.

Б.Батхүү, Ц.Баярсайхан нарын мэдлийн Чингисхаан банканд Нийгмийн даатгал, Эрүүл мэндийн даатгалын сангийн 130.7 тэрбум төгрөг байршиж байсан нь эрсдэлд орсон гэдгийг Монгол Улсын Ерөнхий аудитор мэдэгдчихсэн. Мөн Монголбанкны дэд ерөнхийлөгч Г.Дөлгөөний “Чингис хаан банк төлбөрийн чадваргүй болсон нь үнэн” гэдэг мэдэгдэл төрийн мэдлийн 130 тэрбум төгрөг салхинд  хийсчихсэн болохыг баталдаг.

Эцэст нь энэ бүхнээс харвал  Хөгжлийн банкны чанаргүй зээлдэгч "Мондулаан трейд" ХХК болон төлбөрийн чадваргүй болж дампуурах дээрээ тулаад байгаа Чингис хаан банкны нууц эзэнтэн нь Б.Батхүү, Ц.Баярсайхан, А.Соёлмаа нараар халхавч хийсэн Сангийн сайд Б.Жавхлан байх магадлалтай байна.

ЭХ СУРВАЛЖ: NEWSTV.MN