Төрийн албаны тухай хуулийн 23.2.1-т яамны Төрийн нарийн бичгийн даргаар томилогдох бол төрийн албанд 16-аас доошгүй жил, үүнээс эрхэлсэн түшмэлийн албан тушаалд 8-аас доошгүй жил ажилласан байх бөгөөд мэргэжлийн багц сургалтад хамрагдаж, амжилттай суралцаж төгссөн байх шаардлагатай гэсэн хуулийн заалт бий. 

Гэтэл шинээр байгуулагдсан Цахим хөгжил, харилцаа холбооны яамны Төрийн нарийн бичгийн даргын албан тушаалд төрд 1,5 жил ажилласан ажлын туршлагатай Б.Болор-Эрдэнийг томилсон нь цагаан дээр хараар бичсэн төрийн хуулийг уландаа гишгэлсэн үйлдэл боллоо.

Б.Болор-Эрдэнийн тухайд сүүлийн нэг жил гарангийн хугацаанд Харилцаа холбоо, мэдээллийн технологийн газрын даргаар ажиллаж байгаад ийнхүү тушаал дэвшиж байгаа аж.

Улстөрийн хүрээнд Б.Болор-Эрдэнийг Ерөнхий сайд Л.Оюун-Эрдэнэтэй найз нөхдийн харилцаатай нэгэн хэмээн ярьдаг. Энэ утгаараа төрд ажилласан туршлагагүй түүнийг Цахим хөгжлийн яамны төрийн нарийн бичгийн даргаар томилогдоход Ерөнхий сайд Л.Оюун-Эрдэнэ дэмжлэг үзүүлж, дээш нь татсан байж болзошгүй байгаа юм.

Б.Болор-Эрдэнийн ажлын туршлага:

-2011-2012 онд Азийн хөгжлийн банкны төслийн мэргэжилтэн,

-2012 онд Мянганы сорилтын санд туслах мэргэжилтэн

- 2013 онд Дэлхийн банкны төслийн хяналт, шинжилгээ, үнэлгээний мэргэжилтэн,

-2017 онд Их Британийн Нэгдсэн Вант Улсын Засгийн газрын Анализ шинжилгээний газар судлаач, Нэгдсэн үндэсний байгууллагын Хүнс, хөдөө аж ахуйн байгуулагад гэрээт зөвлөх,

-2018 онд Дэлхийн банкны Австрали Улс дах салбарт гэрээт зөвлөх,

-2019 онд Английн Оксфордын Их сургуультай хамтарсан “Цахим эрин дэх Монгол Улс” төслийн ерөнхий зохицуулагч,

-2020 оноос өнөөдрийг хүртэл Засгийн газрын Хэрэг эрхлэх газрын Цахим хөгжлийн үндэсний хорооны ажлын албаны даргаар тус тус ажиллаж байсан туршлагатай.