"Багануур" ХК сүүлийн хоёр жил орчмын хугацаанд Шилэн данс хөтлөхгүй байна гэдэг шүүмжлэлд өртсөөр ирсэн. Төрийн өмчит уул уурхайн томоохон компани ийнхүү Шилэн дансны хуулийг хэрэгжүүлэхгүй байгаа нь “шахаа” тойрсон худалдан авалттай холбоотой гэдгийг эх сурвалж хэлж байна. Тиймээс тус компанийн удирдлагууд ямар нэгэн байдлаар шилэн дансаа хугацаанд нь үнэн зөв хөтлөхөөс зайлсхийх, зарим тохиолдолд худалдан авалттай холбоотой мэдээллүүдийг албаар хугацаанаас нь хоцроож байршуулах зэргээр хуулийг гууль болгосоор иржээ.

"Багануур" ХК-ийн тухайд зөвхөн 2019 онд л гэхэд 23,6 тэрбум төгрөгийг түлш шатахуун, сэлбэг хэрэгсэл худалдан авахад зарцуулсан байна. Ингэхдээ тус онд 817.1 сая төгрөгийн үнэ бүхий сэлбэг хэрэгсэл худалдан авсан ч эдгээр сэлбэг хэрэгслүүдийг үйлдвэрийн үйл ажиллагаанд цаашид огт ашиглаагүй гэдэг мэдээлэл байна. Өөрөөр хэлбэл, "Багануур" ХК-ийн гүйцэтгэх захирал Э.Номинчулуун нар энэ мэтээр мэдэгдэж байгаачлан ганцхан жилийн дотор 817 орчим сая төгрөгийн огт хэрэгцээгүй сэлбэг материал худалдан авч, Багануур ХК-ийн хөрөнгийг үнэгүйдүүлэн үрэн таран хийсэн гэдэг асуудал эндээс ойлгогдож байгаа юм.

Мөн өөр нэг ноцтой зүйл байгаа нь "Багануур" ХК-ийн бараа материалын дансны үлдэгдэлд бүртгэлтэй огт ашиглалтгүй 2,2 тэрбум төгрөгийн бараа материал байна гэдэг мэдээлэл юм. Энэ нь тоног төхөөрөмжийн шинэчлэл хийхэд өмнөх автомашин, техникт зориулан худалдан авсан сэлбэг хэрэгсэл нь дараагийн автомашинд таарахгүй болсон тоног төхөөрөмжийн хуримтлал аж. Өөрөөр хэлбэл, Э.Номинчулуун нарын балгаар "Багануур" ХК-ийн сэлбэгийн агуулахад 2,2 тэрбум төгрөгийн үнэ бүхий хэрэгцээгүй сэлбэг хэрэгсэл зэвэнд идэгдээд хэвтэж байгаа болох нь бас л тодорхой байна.

Энэ бүхнээс хамгийн ноцтой нь тус компани тендерийн хуулийг огт хэрэгжүүлдэггүй асуудал ажээ. "Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай” хуулийн 8 дугаар зүйлийн 8.1.1 -д заасан “50.000.001 төгрөгийн босго үнээс дээш төсөвт өртөгтэй, бараа, ажил , үйлчилгээг худалдан авахад энэ хуульд өөрөөр заагаагүй бол нээлттэй тендер шалгаруулалтын журмыг хэрэглэнэ” гэж хуульчлан заасан байдаг.

Гэтэл "Багануур" ХК-ийн ТУЗ-ын зүгээс Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 8 дугаар зүйлийн 8.417, 8.518 дахь заалтыг ноцтойгоор зөрчин Засгийн газрын 2013 оны 68 дугаар тогтоолоор баталсан босго үнээс дээш 27,260.2 сая төгрөгийн төсөвт өртөг бүхий бараа, ажил, үйлчилгээг шууд гэрээ байгуулах журмаар зохион байгуулна гэснийг журамлан тогтоол үйлдэж 2019 оноос хойш тендер зарлалгүйгээр шууд гэрээ байгуулах замаар бараа материал худалдан авсаар иржээ. Энэ нь эцэстээ тус үйлдвэрт тэрбум, тэрбумын үнэ бүхий хэрэгцээгүй сэлбэг хэрэгслийн хуримтлал үүсч, хэсэг бүлэг хүмүүсийн шахааны бизнес цэцэглэн хөгжих үндэс болсон бололтой байна.

Үргэлжлэл бий..

ЭХ СУРВАЛЖ: NEWSTV.MN