Монгол Улсын Засгийн газраас 2023-2025 оныг Монголд зочлох жил болгон зарласантай холбогдуулан Монгол Улсыг олон улсад нэгдсэн дүр төрхтэйгөөр сурталчлах зорилготой “Go Mongolia” үндэсний шинэ брэндээр дамжуулан Соёлын яам Монгол Улсыг олон улсад сурталчлан таниулах чиглэлээр олон ажил хийж гүйцэтгэж байна. Энэхүү ажлын томоохон хэсэг болох “Go Mongolia” үндэсний брэндийг олон улсад сурталчлах чиглэлээр Нийслэлийн Засаг даргын Тамгын газартай хамтран Их Британи, Умард Ирландын Нэгдсэн Хаант Улсын мэргэжлийн хөлбөмбөгийн Примьер лигийн Фулхэм клубтэй хамтын ажиллагааг нээлтийн арга хэмжээ 2024 оны 6 дугаар сарын 9-ний өдөр зохион байгуулагдлаа.

Дэлхийн 190 гаруй улсын, зарим тооцооллоор 4 тэрбум орчим үзэгчидтэй хөлбөмбөгийн спортын шилдэг лиг болох Примьер лигийн улирлын тоглолтуудын үеэр “Go Mongolia” үндэсний брэндээр дамжуулан олон зуун сая хөлбөмбөг сонирхогчдод Монгол Улсыг сурталчлан таниулах боломж нээгдэж байна. Дээрх хамтын ажиллагааны хүрээнд Фулхэм клуб нь Примьер лигийн 2024-2025 оны улирлын турш багийнхаа албан ёсны бэлтгэлийн хувцас, хэрэгсэл, албан ёсны цахим хуудас, нийгмийн сүлжээн дэх мэдээллийн сувгуудаараа дамжуулан дэлхийн сая сая хөл бөмбөг сонирхогчдод “Go Mongolia” брэндийг танилцуулж, үүгээрээ дамжуулан Монгол Улсыг олон улсад сурталчлах юм.

Мөн Фулхэм клуб “Go Mongolia” үндэсний брэндийг “албан ёсны бэлтгэлийн хэрэгслийн түнш”, “албан ёсны аялал жуулчлалын түнш”-ээрээ зарлаж, өөрийн талбайдаа хүлээн авах бүх тоглолтынхоо дундуур, тоглолтын өмнөх болон дараах хэвлэлийн бага хурал, ярилцлагын арын самбар, “ЕА (И-ЭЙ) Спорт Хөлбөмбөгийн Клуб” компьютер тоглоомын холбогдох хэсгүүдэд болон тус клубийн тоглогчдыг оролцуулан “Go Mongolia” брэндийн сурталчилгааг байршуулах юм. "Go Mongolia Үндэсний брэнд - Фулхэм клубийн хамтын ажиллагаа"-ны нээлтийн арга хэмжээнд Фулхэм клуб болон Австралийн Холбооны улсын шигшээ багийн үндсэн хаалгач асан, домогт хөлбөмбөгч ноён Марк Шварзер болон тус Клубийн албаны төлөөлөгчид хүрэлцэн ирж, оролцов.