УИХ-ын гишүүн Ж.Бат-Эрдэнэ “Шинэ хоршоо ба малчдын санал” хэлэлцүүлэгт оролцов. Тэрээр Засгийн газраас орон даяар хэрэгжүүлж байгаа “Шинэ хоршоо” хөдөлгөөн цаг үеэ олсон, зайлшгүй хэрэгжүүлэх шаардлагатай, олон айл, малчны ахуй байдлыг дээшлүүлэх боломж гэж харж байна гэв.

УИХ-ын гишүүн Ж.Бат-Эрдэнэ:

-Би “Шинэ хөдөө” хөтөлбөрийг 2017 оноос хэрэгжүүлээд үндсэндээ 7 жил ярисаар өөрийгөө хөдөөний хүн шиг сэтгэдэг болгочихоод байна. Үхрийн мах өнгөрсөн жил кг нь 30 гаруй мянган төгрөгт хүрсэн. Хотынхон маань их бухимдсан. УИХ-ын дарга Г.Занданшатар захирамж гаргаад таван гишүүнийг хойд зах руу явуулсан. Би бас явсан. Амьдрал мэддэггүй хүн зах дээр очлоо гээд хамгийн ихээр баалуулсан. Амьдрал мэдэхгүйдээ биш л дээ. Хойд зах дээр өдөр бүр 25 тонн мах орж ирдэг байсан бол өнгөрсөн жил таван тонн мах дөнгөн данган орж ирж байсан. Яагаад гэвэл зуд болохоор мал үхэх нь үхээд турах нь тураад нам уначихаж байгаа юм. Ийм тохиолдолд махны нийлүүлэлт байхгүй болчихдог. Махны нийлүүлэлтгүй болчихоор Улаанбаатарт хомстол бий болсон. Энэ байдлаас гарахын тулд хөдөө аж ахуйгаа хөгжүүлэх ёстой. Мал аж ахуйг хөгжүүлнэ гэхээр хэдэн гахай хашаанд оруулж тэжээх юм шиг хотынхон ойлгодог. Энэ бол хэдэн малчны асуудлыг дэмжих гээд байгаа юм биш. Энэ бол хүнсний аюулгүй байдал, хангамжийн асуудал шүү дээ. “Шинэ хөдөө” хөтөлбөр маань “Шинэ хоршоо” хөдөлгөөн болж өргөжиж байгаад харин ч талархалтай байгаа. Засгийн газраас хэрэгжүүлж байгаа таван их наядын хөтөлбөр болж хэрэгжихээр асар том дамар эргэлээ гэж үзэж байна.