УИХ-ын 2024 оны сонгууль урьд урьдынхаас огт өөр болох шинжтэй. Үүнийг тогтолцоо өөрчлөгдөж, “тоо” нэмсэнтэй холбож ойлгож болно. Эдгээр өөрчлөлтийг УИХ-аар баталсны дараахнаас л улс төрийн намууд, нам намын фракцууд, хувь улстөрчид судалгаа руу хошуураад эхэлсэн. Тэд намаа, фракцаа, өөрийгөө хаахнуур “давхиж” явна вэ гэдгийг үзэх гэж тал бүрээс нь судлуулж байгаа аж. “Том 13 тойрогт хэн хэн нэр дэвшвэл боломжтой байна вэ”, “Жагсаалтад хэн хэнийг бичвэл сонгогчдод таалагдах вэ” гэх мэтээр нарийвчилсан, тоймчилсон судалгаа тоймгүй олон гарчээ. Ёстой л ёоз ёозоор нь судалгаа хийлгэх болжээ. Тэр үйл ажиллагаа нь одоо ч дуусаагүй аж.
Уг нь Сонгуулийн төв байгууллагаас судалгааг хориглодог. Гэхдээ энэ нь олон нийтэд мэдээлэхтэй холбоо ой. СЕХ-ны Нарийн бичгийн дарга Д.Даваа-Очир "Хуульд зааснаар шинэ оны эхнээс зарим төрлийн хязгаарлалтууд хэрэгжиж эхэлсэн. Харилцаа холбоо болон хэвлэл мэдээллийн хэрэгсэл, цахим орчин ашиглан улс төрийн чансаа тогтоох зорилго бүхий аливаа хэлбэрийн шалгаруулалт, санал асуулга зохион байгуулсан нь эрүүгийн хариуцлага хүлээлгэхээргүй бол Зөрчлийн тухай хуулиар торгох заалттай" гэж анхааруулсан. Харин улс төрийн нам, тэдний фракц, улстөрчдийн зүгээс хийлгэж буй судалгаанууд үүнд хамаагүй бололтой юм. Учир нь байсгээд л аль нэг нам нь "Бид ялахаар судалгааны дүн гарлаа" гэсэн албан бус мэдээллийг тараасаар байна.
Тэгвэл АН-ын саяхны нэгэн судалгаа тус намын гишүүдийн анхаарлыг нэлээд татаад байна. Сонгууль болоход хоёр сар, нэр дэвшигчид тодроход ганцхан сарын хугацаа үлдсэн үед судалгаа бүр асар үнэ цэнэтэй гэсэн үг. Яг л ийм хүлээлтээр хийлгэсэн бололтой нэгэн судалгааны дүнгийн талаар тус намынхан ойрын үед хоорондоо шивэр авир ярьцгааж байна. Яасан гэвэл, тэр судалгааных нь “...АН-ын топ лидерүүд хэн бэ” гэсэн асуултын дүнд Лу.Гантөмөр, Ц.Элбэгдорж, Х.Баттулга, Б.Хурц, Ц.Уянга, Н.Амаржин, Д.Амартүвшин нар тэргүүлж гарч ирсэн байна. Магадгүй, дээрх хүмүүс хэвлэл, олон нийтийн сүлжээгээр хамгийн идэвхтэй ярьж, яригдаж байдагтай холбоотой бололтой. Харин үүнд АН-д олон жил явж, тэр хэрээрээ тус намын толгой улстөрчдийн эгнээнд явсан хүмүүс тийм ч таатай хүлээж аваагүй байна.
Эх сурвалж: “Зууны мэдээ” сонин
